PNoy: Senator-judges, dapat makinig sa taumbayan

Makahulugan ang mensahe ni Pangulong Aquino sa pulong-bayan kasama ang mga estudyante, na nataon sa ika-26 na anibersaryo ng panawagan ng kanyang yumaong ina para sa isang civil disobedience laban sa rehimeng Marcos.

Iniugnay ito ng pangulo sa impeachment trial ni Chief Justice Renato Corona.

"Ito po ang naging unang hakbang ng taumbayan tungo sa rebolusyon ng EDSA. Tila sadya tayong hinihilo o inililigaw para mawalan ng interes,” sabi ng pangulo.

“Magpapa-etsa-puwera na lang po ba si Juan at Juana de la Cruz sa prosesong ito? Hahayaan na lang po ba natin na iilan ang magdesisyon para sa atin pong lahat?"

Dapat daw makinig ang mga senator-judge sa kung ano ang gusto ng nakararami o managot sa darating na halalan.

“Eleksyon next year. Sila po kinatawan natin, e. So dapat ho susunod sila doon kung anong gusto ng mga nagpahiram sa kanila ng kapangyarihan,” ani Aquino.

Inilahad din ng pangulo kung bakit dapat daw matanggal sa puwesto si Corona.

"’Di ho ba tayong lahat ay mapapasabing: ‘Naman, maliwanag pa po sa sikat ng araw, Ginoong Corona, ang sinumpaan mong salaysay ay hindi tugma sa natuklas na pag-aari mo.’”

Kinuwestyon din ng pangulo ang pagtanggi ni Corona na ilabas ang mga dollar account umano nito.

"Kung wala kang ginawang mali, wala kang dapat itago. Kayo nga po ang tanungin ko: ganito ba umasta ang isang taong dapat walang katakutan?”

Sagot naman ng abogado ni Corona, hindi pinagtatakpan ng punong mahistrado si Ginang Arroyo. Huwag muna raw husgahan ang kanilang kliyente habang hindi pa natatapos ang proseso ng impeachment.

Ani Tranquil Salvador, abogado ni Corona, “’Yung detalye niyan, ipakikita namin 'pag kami na ang nagprisinta, and these are details of our case na ayaw naman namin talakayin dito.”

Naputol lang ang seryosong usapan nang magtanong sa pangulo ang isang law student tungkol sa kanila ni Grace Lee.

"Uunahin ko na po 'yung naipangako ko sa mga kapwa mag-aaral ko ng abogasya, kamusta na daw po kayo ni Grace Lee?” tanong ni Dino Austria, estudyante ng San Beda College Alabang.

“Napaka-related nga sa law,” pagbibiro ng pangulo. “Maayos naman.”

Apela lang ng pangulo sa publiko: huwag nang idamay ang ina ni Lee na pinupuntahan daw ng mga usisero ang grocery store nito. Willard Cheng, Patrol ng Pilipino

Share your views