Kampo ni Corona nais magdemanda dahil sa bank records

Ikinagulat ng depensa ang pagkakasangkot na ito ni Quezon City Congressman Jorge Banal sa kumalat na umano'y kopya ng bank records ni Chief Justice Renato Corona.

Peke man o hindi ang mga dokumento, labag daw sa Bank Secrecy Law at sa Foreign Currency Deposit Act ang pagbitbit ni Banal sa bangko ng mga dokumento.

“Sabihin na nating nakakuha ako ng dokumento na may kaso ako, I will go to court and manifest that on this date, I got this document and for whatever it is worth, ipapasa ko sa korte,” sabi ni Atty. Rico Quicho, isa sa mga abugado ni Corona.

Hindi raw kapani-paniwala ang kuwento ni Banal na iniwan lang sa gate ng kanilang bahay ang mga dokumento.

Duda rin ang depensa sa pahayag ng prosekusyon na wala silang alam na may hawak na mahalagang impormasyon si Banal.

Pinag-aaralan na ng depensa ang pagsampa ng kasong kriminal kina Congressman Banal, Reynaldo Umali, Niel Tupas Jr. at lahat ng sangkot sa kumakalat na umano’y bank records.

Posible rin daw nilang ireklamo ang mga ito sa ethics committee ng Kamara.

“’Yung claim na iniwan sa labas ng bahay, ‘yung claim na may nagbigay sa Senado, ‘yung claim na may nagpadala sa opisina niya. Suriin natin dahil madaling gumawa ng kuwento pero mahirap patunayan,” sabi ni Quicho.

Pero hindi naman natinag ang prosekusyon. Gusto lang daw malihis ng depensa ang atensyon ng publiko.

“Pag-aralin na lang nila ‘yung depensa nila. Mahirap ipaliwanag ang iba’t-ibang undeclared properties. Congressman Banal can take care of himself,” sabi ni Rep. Miro Quimbo, tagapagsalita ng prosekusyon.

Ipinagtanggol din ng Palasyo si Banal.

Wala raw mali sa kanyang paghingi ng tulong sa PSBank.

Pinatunayan nga raw ni Banal na nagtutulungan ang buong prosekusyon sa pagpursigi sa kaso. Jing Castañeda, Patrol ng Pilipino

Share your views